Mic 5 | CYM | STEP | Ar hyn o bryd rwyt ti'n torri dy hun â chyllyll ti ddinas dan ymosodiad! Mae'r gelyn yn gwarchae arnon ni! Maen nhw'n taro arweinydd Israel ar y foch gyda theyrnwialen.

Micah 5

1 Ar hyn o bryd rwyt ti'n torri dy hun â chyllyll ^a
ti ddinas dan ymosodiad!
Mae'r gelyn yn gwarchae ^{▼▼5:1 gwarchae Pan oedd byddin yn ymosod ar ddinas roedd yn amgylchynu'r ddinas a'i thorri i ffwrdd fel bod neb yn gallu mynd i mewn nac allan.} arnon ni!
Maen nhw'n taro arweinydd Israel
ar y foch gyda theyrnwialen.

Y brenin sydd i ddod

2 Ond wedyn ti, Bethlehem Effrata, ^c
rwyt ti'n un o'r pentrefi
lleiaf pwysig yn Jwda.
Ond ohonot ti y daw un
fydd yn teyrnasu yn Israel –
Un sydd â'i wreiddiau yn mynd yn ôl
i'r dechrau yn y gorffennol pell.
3 Felly bydd yr Arglwydd
yn rhoi pobl Israel i'r gelyn,
hyd nes bydd yr un sy'n cael y babi
wedi geni'r plentyn.
Wedyn bydd gweddill ei deulu yn dod adre
at blant Israel.
4 Bydd yn codi i arwain ei bobl
fel bugail yn gofalu am ei braidd.
Bydd yn gwneud hyn yn nerth yr Arglwydd
a gydag awdurdod yr Arglwydd ei Dduw.
Byddan nhw yno i aros,
achos bydd e'n cael ei anrhydeddu
gan bawb i ben draw'r byd.

Yr Arglwydd yn achub ei bobl

5 Bydd e'n dod â heddwch i ni.
Os bydd Asyria'n ymosod ar ein tir
ac yn ceisio mynd i mewn i'n plastai,
bydd digon o arweinwyr i'w rhwystro!
6 Byddan nhw'n rheoli Asyria gyda'r cleddyf;
gwlad Nimrod ^{▼▼5:6 gwlad Nimrod enw arall ar Asyria.} gyda llafnau parod!
Bydd ein brenin yn ein hachub
pan fydd Asyria'n ymosod ar ein gwlad,
ac yn ceisio croesi ein ffiniau.

Yr Arglwydd yn cosbi ei bobl

7 Bydd pobl Jacob ^{▼▼5:7,8 Jacob Yma mae ‛Jacob‛ yn cyfeirio at Jwda, teyrnas y de.} sydd ar ôl
ar wasgar yng nghanol y bobloedd,
fel y gwlith mae'r Arglwydd yn ei anfon,
neu gawodydd o law ar laswellt –
sydd ddim yn dibynnu ar bobl
na disgwyl am eu caniatâd cyn dod.
8 Bydd pobl Jacob sydd ar ôl
yn byw yn y gwledydd,
ar wasgar yng nghanol y bobloedd.
Byddan nhw fel llew yng nghanol yr anifeiliaid gwylltion,
neu lew ifanc yng nghanol praidd o ddefaid –
yn rhydd i ladd a rhwygo
heb neb i'w stopio.
9 Byddi'n codi dy law i daro'r rhai sy'n dy erbyn,
a dinistrio dy elynion i gyd!

Yr Arglwydd yn puro ei bobl

10 “Bryd hynny,” meddai'r Arglwydd,
“bydda i'n cael gwared â'ch arfau i gyd –
y ceffylau a'r cerbydau rhyfel. ^f
11 Bydda i'n dinistrio trefi'r wlad
ac yn bwrw i lawr y caerau amddiffynnol.
12 Bydda i'n stopio eich dewino a'ch swynion,
a fydd neb ar ôl i ddweud ffortiwn.
13 Bydda i'n dinistrio eich delwau cerfiedig
a'ch colofnau cysegredig.
Fyddwch chi byth eto yn plygu
i addoli gwaith eich dwylo eich hunain. ^g
14 Bydda i'n diwreiddio polion y dduwies Ashera, ^{▼▼5:14 Ashera duwies ffrwythlondeb.}
ac yn dinistrio eich eilun-dduwiau.
15 Bydda i'n dial yn wyllt
ar y gwledydd sy'n gwrthod gwrando arna i.”